उदयपुरको कटारीमा 'देवास राई भाषाको समाजभाषावैज्ञानिक अध्ययन' विषयक गोष्ठी सम्पन्न

भाषा आयोगले वि.सं. २०८२ पुस २२ गते उदयपुरको कटारीमा 'देवास राई भाषाको समाजभाषावैज्ञानिक अध्ययन' विषयक कार्यक्रमको आयोजना गऱ्यो । भाषा आयोगका माननीय अध्यक्ष डा. गोपाल ठाकुरको अध्यक्षतामा आयोजना गरिएको कार्यक्रमको प्रमुख अतिथि कटारी नगरपालिकाका अध्यक्ष राजेश श्रेष्ठ हुनुहुन्थ्यो । कटारी प्रज्ञा प्रतिष्ठानका अध्यक्ष कुमारसिंह राईले स्वागत मन्तव्य राख्नुहुँदै भाषा आयोगले महत्वपूर्ण कार्यक्रम राखेकोमा प्रसन्नता व्यक्त गर्नुभयो । कार्यक्रममा कटारी नगरपालिकाका उपमेयर गीता खड्कालगायत सहभागी वक्ताहरूले पनि आ -आफ्ना धारणा राख्नुभएको थियो । भाषाविद् डा. कृष्णप्रसाद चालिसेले देवास राई भाषाको समाजभाषावैज्ञानिक अध्ययन गर्दाका चुनौतिका बारेमा जानकारी गराउनुभयो ।

कार्यक्रममा धन्यवादज्ञापन गर्नुहुँदै भाषा आयोगका माननीय सदस्य मातृका पोखरेलले देवास राई भाषाको बारेमा यो कार्यक्रम गर्नुको मूल उद्देश्य तथ्यहरूको आधारमा सत्य पत्ता लगाउनु हो भन्नुभयो । गोष्ठीमा कटारी नगरपालिकाका शिक्षा संयोजक सन्जु दाहालले पनि मन्तव्य राख्नुभएको थियो । कार्यक्रममा किरात देवास राई उत्थान समाजका केन्द्रीय पदाधिकारीहरू, किरात राई यायोक्खाका स्थानीय पदाधिकारीहरूको उल्लेख्य उपस्थिति थियो ।

उक्त कार्यक्रम कटारी नगरपालिकाको सहकार्य र कटारी प्रज्ञा प्रतिष्ठानको संयोजनमा गरिएको थियो ।

000